रातराणी पसरविली रे......

मज सवे स्वप्ने पाहिली रे तूच ती
रंगात मेंदीच्या रंगविली रे तूच ती

ओठावर रुळला होता मूक हुंदका
फुले हास्यांची सजविली रे तूच ती

दाही दिशा मजसि हळुवार वाटल्या
अचानक प्रीत जागविली रे तूच ती

झोपलेल्या रानांत काळोख अति गर्द
काजव्यांना वाट दाखविली रे तूच ती

दाटून आला उर कसा ह्या सांजवेळी
गोड मिठीत रात्र फुलविली रे तूच ती

चांदणे फुलांचे शिंपले कुणी आकाशी
धरावर रातराणी पसरविली रे तूच ती

दीपिका 'संध्या'